أهازيج وأغاني موسم الزّيتون

يعتبر موسم الزّيتون من أهمِّ المواسم التي يعيشها الفلسطيني

  ومن اكثرها جمالاً, حيث يتجلّى تعاون جميع أفراد الأسرة 

الشيخ الكبير والجدة العجوز والكنة والأبناء والبنات والجيران,

فَجداد الزّيتون يحتاج العون والتّعاون من الجميع .

 ويسعى الفلاح  جاهداً أن يعين نفسه ويسلَّيها ليمضي الوقت دون أن يشعر بالتعب

 فتجده يصدح بالأغاني والأهازيج التي 

التي تحكي عن الزّيتون  فيقول 

عاليادي عاليـادي ............... بدي أغني لبـلادي

قعدة تحت الزيتوني ............ بْتِسوى المحيط الهادي

زيتونتنـا الجويـة .............. شو حلوة وشـلبـية

من الوادي تشرب مّيه .........بتشرب مّيه من الوادي

اللازمة:

قعدة تحت الزيتوني ........... بتسوى المحيط الهادي

الزيتونة لا تنسوها ................ بالمجد زيّنوها

أجدادي زرعوها ................... زرعوها أجدادي

اللازمة:

قعدة تحت الزيتوني ............... بتسوى المحيط الهادي

زيتوني ما أحسنها ............... بالصيف وما أثمنها

الحصّادي تحت منها ............ تحت منها الحصّادي

اللازمة:

قعدة تحت الزيتوني .............بتسوى المحيط الهادي

النوم في فيّتها .................. بسوى الدنيا وزهرتها

والمبادي بتربتها ............... بتربتها المبادي

ويتغنى الفلاح بالزيتون وفيّه وكيف يعتبره ملقى للعشاق و لأهل السَّمر

غربيّ المارس، شرقيّ المارس .. دخلك لفّيني أكلني القارص

 بكرا يا بنيّا بتيجي المدارس .... ونتلاقى سوا بفاي الزَّيتونا 

على دلعونا ليش دلعتيني ..... اعرفتيني شايب ليش أخذتيني

سقا الله أيّام العنب والتيني        . وأنا وايّاكي بفيّ الزيتونا

شفت الحلوة تحت الزيتوني .......من أوّل نظرة علقت عيوني

بالله يا أهلي اوعوا تلوموني .... بحبّ السمرة أنا المجنونا

طاحت تتخطّم بالثوب الازرق ....واللي يعاديها في البحر يغرق

حلّت العصبة وبيّن المفرق ......الله يجمعنا بفي الزيتونا

بظِل الزيتوني وفي ظلّ التيني ..... بطلب يا حلوي تيجي تلاقيني

حبّك يا سمرا هلّي ساليني ......... وقضيت العمر منك محروما

غيبي يا شمس، يا شمس غيبي .... بلكي بتلاقى أنا وحبيبي

على الله الأسمر يطلع نصيبي .... وأدفعلوا مهرو كرم الزيتونا

بفيّ الزيتونة ياما قيّلنا ..... وشوف الحبايب طيّر زعلنا

من الساعة ستة وأنا بستنّى ..... حضرة جنابكْ يَ امِّ العيونا

ياما هوّدنا العصر ع العينِ ..... وياما لاقاني غزلان اثنيني

ياما قلتلهن ثالثكن وينِ ..... قلن بستنّا بفاي الزيتونا

جنب النافورة وسط الخمايل ..... شفت شحرورة ع غصن مايل

الحقت يا اخواني وفي إيدي شايل .. قنّاصة مصنوعة بخشب الزيتونا

ومن الاهازيج التي فيها حنين وشغف للوطن 

يا طير طاير ميّل عالوادي وجيبلي من كرم العنب زوّادي

شويّة زعتر مع تين سوّادي وزيت الفغيش وحبّ الزيتونا

حياتنا كانت أحلى من السكّـر لمّا نتجمّع والساحا تعمر

وصبحيّة نفطر زيتون وزعتر والخبز محمّر من الطابونا

زيتوني الأخضر زيتوني الأسمر من غيرو السفرة ولا مرّة تعمر

والقلب يفرح سـاعة ما يكـبر من منتوجـاته أحلـى صابونا

سألت الاسم قالتلي غادة حلوة وزغيرة وحوّارة بلادا

يا خيّ لمّن بفتح بـرّادا بشبع مقدوس وجبني وزيتونا

راكب حماره ، راكب حماره دربه بعيدة وكَوَتني ناره

يا ريتني عبده واخدم في داره وأجيب له عدس مع الزيتونا

ويردد الأطفال

        على دلعونا وعلى دلعونا.. زيتون بلادي أجمل ما يكونا

              خبز ملتوت وجبنة طرية ... وأكلة ادّفينا بالشتوية

زيتون بلادي واللوز الأخضر ..... والمريمية وما بنسى الزعتر

     وأقراص العجة لمّا بتتحمّر .... ما أطيب طعمتها بزيت الزيتونا

وصحون السحلب والهيطليّة .....خلّتنا ننسى بردة كانونا

يا ربي تشتي ونلبس طاقية .... ونلبس كبود ونحمل شمسيّة

ونغني سوى يا فلسطينيّة ..... دايم في بلادي خبز الطابونا

       على دلعونا على دلعونا - زيتون بلادي أجمل ما يكونا

أمي راحت تتسوَّق

أمي راحت تتسوَّق

أختي بتخبز في الطَّابون.

ستِّي عملت لي عجِّة

قلتها بزيت الزيتون.

قالت لي طعمي صحابك

لا تنسى تدفي حالك.

قلت الها شكرا كثير

عالعجة وزيت الزيتون

أمي راحت تتسوق

أختي بتخبز في الطابون.

ستي عملت لي عجة

قلتها بزيت الزيتون.

قالت لي طعمي صحابك

لا تنسى تدفي حالك.

قلت الها شكرا كثير

عالعجة وزيت الزيتون

لازمة

على دلعونة وعلى دلعونة

بارك يا ربي شجر الزيتونا

زيتون بلادي ما أزكى حباتة

ما أحلى شكلة وما أغلى زيتاتة

والعالم كلة يرغب أكلاته

الحبة منه أحسن ما يكونا

لازمة

على دلعونة وعلى دلعونة

بارك يا ربي شجر الزيتونا

في منة الأخضر فية منة الأسمر

من غيرة السفرة ولا مرة بتعمر

القلب بيفرح ساعة ما بيكبر

من منتوجاتة بنعمل صابونا

لازمة

على دلعونة وعلى دلعونة

بارك يا ربي شجر الزيتونا

الزيتون

--------

يلا يلا يا عفيف

أحنا في فصل الخريف

بدنا نكت الزيتونة

بالعصاي يا عيوني

أما أنت يا تغريد

ناد يلي ع أم السعيد

تقعد تحت الزيتونة

ونكت الحبة بالأيد

والحبات عالفلات

بركة من أحلى البركات

زدنا يا ربي خيرات

وبارك في شجر الزيتون 

 والفلاح يحمله الحنين ليتذكر زارعي الزيتون

ويتذكر الأهل والأحبة الذين يعيشون خارج

الأوطان قسراً 

- الزيتوني اشتاقت للّي زرعوها .... وزيتات الموني منها أخذوها

عودوا بجاه الله، عودوا شوفوها .. الأوراق اصفرّت، ذبلت الغصونا

- انزلت عالأرض تشوف دياري ..... إلقيت الأرض تغنّي أشعاري

يا محلى العيشي جوّ الديار ..... نفلح ونقطف حبّ الزيتونـا

- يا طير طاير يللي في العالي ..... ودّي سلامي للّـي في بالـي

علّي جناحك مع الشمالـي ..... وجبلي بمنقارك غصن زيتونا

- في أرض بلادي والبسمة السمحا ...... ينزل عليها بتقُولي مرّحا

لأزرع السمسم واحصد القمحا .... وعمّر أرضي أرض الزيتونا

- حب الطرب لأطلع بفنونـي ..... وبحب الوطن اوعوا تلوموني

لأزرع في الأرض شجرة زيتونِ .... وهذا شعارك يا فلسطينا

- بطّلنا نغنّي (عاليادي، اليادي) ..... بنغنّي للثوّار اتعيد البلادي

وتزرع أرضنا السهل والوادي ..... كيلو جوّافا وعنب وزيتونا

- يا ريت لبلادي تدوم السعادي ..... وربّي يحميها من الأعادي

ورْجال بتسحّج ويغني الحادي.....على عرس التين وعرس الزيتونا

- الأرض السمـرا بدها سواعد ..... احرثها تكون لك أكبر مساعد

عمرك ما تفلح لو تفضل قاعد .... قم يلا احرث ما بين الزيتونا